وعليكم السلام ..

توصل بالسلامة ورحلة سعيدة ، دام زيارتك الأولى لبرشلونة زين إنك خليتها 5 أيام وأصلاً يوم ضايع عليك حق المباراة خخخخخ ..

متأكد إنها راح تعجبك ، مدينة جميلة وونيسة وفيها حياة ورعشة مثلها مثل باقي مدن أسبانيا ..

معالمها السياحية كثيرة طبعاً دام إنك برشلوني أكيد الكامب نو من المعالم المهمة إنك تزور المتحف فيها
في يوم آخر غير يوم المباراة ،

قلعة مونجويك مكان مرتفع جميل تقدر توصله بالتلفريك وفي نفس اليوم تشبك معها القرية الأسبانية ..

ساحة بلازا دي أسبانيا وفيها مبنى متحف كاتلونيا ونافورة راقصة رهييييبة تشتغل يومياً أعتقد حول تسع الليل وتقدر تتأكد من الريسيبشن حق الفندق أو أي مكتب إستعلامات سياحية ..

حديقة بارك غويل ،، كنيسة ساقرادا دي فاميليا ذي اللي لهم مية سنة يبنون فيها وما خلصوها خخخخخخخ
للأمانة معلم جبار وبناء رهيب ممكن تمر حوله ، ولو تبي تدخله إحجز عن طريق موقعهم الرسمي مثل ماعملت لأنه زحمة عند شبابيك قطع التذاكر ..

جهة المارينا والميناء الأولمبي فيها مطاعم وكافيهات وجلسات وممكن تاخذ لك تور بحري .

وعندك الرامبلا ستريت وساحة كتالونيا عاد هذي ما يحتاج من أهم الأماكن فيها وكنت دايماً مخليها في برنامجي اليومي لازم أمر عليهم وأجلس في كافيهاتها وكنت أتعمد في الزيارتين لبرشلونة أسكن حولهم .
في وسط الرامبلا سوق لابوكيريا ، سوق قديم يبيع فواكه عصاير مكسرات شوكلاته مميز بطريقة العرض ، وفيه بعد الحي القوطي حي تاريخي قديم متفرع من الرامبلا .

عندك شارع الباسيج دي غراسيا من الشوارع المهمة والجميلة في المدينة ، شارع راقي وحق تسوق .

هذي الأشياء اللي تحضرني الحين ونت ممكن ترجع لموقع التريب أدفايزرو أهم موقع سياحي وفيه أهم المعالم السياحية وترتيبها حسب أراء زوار الموقع ، أكيد راح يفيدك .

بعد لا أنسى الباصات السياحية ممكن تاخذ تذكره حقت يوم أو يومين ولها أكثر من خط ومسار ، بالنسبة لي مدري بس إذا بجلس في المدينة أكثر من 3 أيام ما أفضل أركب الباص السياحي وتكون كل تنقلاتي يا بالمترو أو الباص .

موقع الفندق معقول جنبك معلم سياحي على نفس إسم الفندق أذكر في زيارتي العام الماضي دقيتها مشي من ساحة كاتلونيا لهالمعلم وخذا مني حول ربع ساعة ، وترا الميناء الأولمبي حولك تقريباً بس على أطول شوي ، بس مثل ما قلت لك ميزة المناطق اللي حول ساحة كتالونيا إنها حية في الليل يعني لو جعت وفكرت تنزل إثنعش بعد إثنعش منتصف الليل راح تلقى عالم ، أما المنطقة اللي إنت فيها ما أدري كيف وضعها الليل ..

ورحلة موفقة وأي شي حنا حاضرين ..

ما قصر الأخ الينور ووضح لك أهم المعالم في برشلونة

عن نفسي انا استخدمت الباص السياحي لمدة يومين ورحت أغلب الأماكن السياحية

والمعالم المزدحمة خصصت لها يوم ثاني بالمترو

وهذا موضوع شامل عن برشلونة

وبالتوفيق للبرشا

https://www.arabtrvl.com/vb/t713.html

سلام عليكم
ما شاءالله فادوك الخبراء واتمنى لك رحلة موفقة إلا اني أضيف "بويرطو اسبانيول " هدا منتجع لجميع أشكال البيوت الاسبانية يتواجد بالقرب من "مون جويك" تقريبا 10 دقايق مشيا. أما بالنسبة للمنطقة اللي بتتواجد فيها "ارك دوتريونف" فهي قريبة لجميع المناطق إلا إنك راح تتنقل بالميترو فبيكون احسن إنك تشري بطاقة لمدة تلات أيام بتكون أحسن واقتصادية، وراح تلقى جنبك العديد من المطاعم التركية والمغربية. وما تنسى الباص السياحي هو راح ياخدك إلى أغلب المناطق المهمة.

Envoyé de mon SM-N910C en utilisant Tapatalk

يعطيك العافية