سلام عليكم ورحمة الله وبركاته
أسعد الله اوقاتكم باليمن والبركات
قبل كل شيء اشكر لكم مساعيكم وجهودكم المباركه في خدمة اخوانكم السياح ومن لايشكر الناس لايشكر الله شكري وتقديري لمعلمي في مرحلة الثانويه نصحنا وأشاد بهذا المنتجى وانه استفاد في منكم في قضاء شهر العسل وبالرغم من قدم الموقف الا ان اسمكم لازال عالق بذهني مع ان مضى عليه قرابة الستة أعوام وعليها
ماعلينا
جايكم اليوم طول الله اعماركم بحكم ان مابقى برصيد اجازتي الشي الكثير ابتديت اجازتي بتبريكات والدتي اطال الله لي بعمرها برغبتها بقضاء العمره والحمدلله تمت على خير ورجعنا وناوي اخذه معي أطيب خاطره بالاسواق الشعبيه بالكويت والاماكن اللي تناسب باللي مثل سنه
يمكن سردي للكلام ملخبط وغير منظم لكن من كثر الامور اللي تشغل عقلي واخاف اني انسى شي واترك شي لكن بشكل عام بصيغها لكم على شكل نقاط واتمنى فعلا القى منكم الجواب الشافي سواء من حبايبنا اهل الكويت او من له خبره فيها
*تحويل العمله وصرف المبلغ بحيث مابي اكون عرضه للاستغلال
*شرايح الانترنت لان ذهابي وإيابي بيكون بشكل يومي ومتكرر وكله يعتمد على الخرائط
*الاسواق والمطاعم والمنتزهات إنصحوني وشوروا علي بقدر ماتستطيعون لاني فعلا بحاجة لأكبر كمية من المعلومات ومابي اطلع بحسره او ندم على انقضاء الاجازه او عدم توفيقي في انتقاء الاماكن وهذي المرة الاولى في حياتي تتجاوز قدمي حدود هذا الوطن.. هو شهر بالسنه وسخرته كله للوالده
همتكم بارك الله فيكم

هلا اخوي
الله يخلي لك الوالده ويطول بعمرها وتعيش وتقوم بواجبك لها

اذا جذيه روحاتكم يوميه اعتقد ان بيتكم بالخفجي
فاقرب مكان لكم هو مدينة الفحيحيل واسواقها حلوه وجمييله وفيها الاسواق الشعبيه والملابس

اتمشوا فيها واستمتعوا يوم كامل وبتلاقي على البحر مجمعات للمطاعم بتلاقي فيهم انواع المطاعم

المولات الموجوده الكوت ومكبرينه وبيفتحونه بعد التجديد هذه الايام
وعندك بعد مجمع كويت ماجيك

هذا يوم

وبعده اذا حاب تروح اسواق العقيله وهي بعد مولات واسواق شعبيه للدراريع والعبايات والمواعين
والمولات البيرق وغيت مول ومول ٨٩

بعدها اهم الاسواق او الاماكن منطقة السالميه واسواقها الفنار وليلى غاليري والمارينا والقعده على البحر بمارينا كريسنت وميناء اليخوت
ومطعم فريج صويلح موجود بالسالميه وعندهم فرع بالمباركيه

وعندك مجمع سوق السالميه فيه سيتي سنتر
وفيه محلات الملابس ودراريع حليوه

وعندك مول ٣٦٠ موجود بمنطقة الزهراء وقريب منه منطقة خيطان فيها اسواق شعبيه للدراريع والعبايات وغيرها

وبعدها نيي للكبير مول الافنيوز اللي يبيله يوم كامل
فيه منطقة السوق القديم فيه مطاعم شعبيه وعبايات وغيرها


اما الديره مدينة الكويت
تلاقي المباركيه وطبعا بتشوف المحلات الشعبيه اللي بتعجب الوالده

وانت تقدر توزع الايام بكل منطقه

الصرف مثل ما قلت لك اسحب من الصراف الالي احسن لك

والشريحه ما اعرف وان شاءالله يعلمونك اصحاب الخبره

بحط لك جدول بالايام والاماكن القريبه من بعض

جدول الكويت
خلي اول يوم المباركيه تغدوا او تعشوا هناك في مطعم فريج صويلح او مطعم الشمم وبعدها تمشوا بالسوق سوق المباركيه وايد حلو وشعبي وبتستانسون فيه
وبعد ما تخلصون السوق
روحوا تمشوا في حديقة الشهيد
في مرحلتين
المرحله الاولى فيها مطاعم والمرحله الثانيه حلوه فيها نافورة ونماذج لمعالم الكويت

هذا اليوم الاول ☝��

اليوم الثاني بيكون الجمعه
اكيد بتطلعون بعد صلاة الجمعه
وصلاة الجمعه بكل المساجد ممتازه ولكن اذا ودكم بزيارة المسجد الكبير فيه زيارات بجولات فيه بس ماني عارفه توقيتهم

بعد الصلاة انصحكم اذا حابين تتمشون الظهر تروحون الافنيوز
مول الافنيوز كبير جدا وتقدرون تتمشون وتتسوقون وفيه مصليات بعد اذا تبون للعصر والمغرب اذا حابين اكل كويتي بعد او تركي او هندي
يعني رز وجذيه روحو منطقة "السوق " هذا قسم بالافنيوز كأنه سوق قديم وفيه مطاعم وجلسات

المطاعم هني كلها اكلات حلوة ارشح لك مطعم الدروازه ...ومطعم كافيه بزه ...او سوتيش التركي
تقدر تطلب منهم القهوة العربيه
او تتقهون بمطعم "حليب وهيل " وتحلون بالحلويات الكويتيه
واعتقد بتلاقونها بالمطاعم نفسها هنا

بعد الافنييوز
في اماكن بالكويت حلوه افتحوها مطاعم وتمشي
١- مركز جابر الاحمد الثقافي
٢-حديقة البوليفارد السالميه
٣-مارينا كريسنت حلو المكان على المرسى للمراكب واليخوت والمكان مطاعم وجلسات
فيه عندهم مراكب او مثل ما تقول تاكسي بحري ياخذكم بجوله بالبحر قريب من الشاطئ تصورون المدينه منها

بعد ما تخلصون من جولة البحر روحوا المركز العلمي فيه اكواريوم
ومكان حلو للاطفال وكافيه
في مطعم بابل على البحر حلو بس غالي شوي بس وايد حلوة قعدته تلاقيه مبنى لحاله على البحر جميل وقعدته جميله

اليوم الثالث
اذا حابين تتسوقون للدراريع تلاقون في المباركية سوق الصفاة
هذا يكون عندهم دراريع جاهزه وحلوة
بعدها روحوا مول ٣٦٠ مجمع تمشوا هناك "
المروج مجمع مطاعم وايد حلو المكان ومزدحم بالناس يعني روحو مبجر
انصحكم بالمكان مميز بالمطاعم والجلسات اللي فيه
وان شاءالله اذا حابين شي ثاني احنا بالخدمة



على فكره
اذا تبون السينما موجوده بكل المولات الافنيوز و٣٦٠ والمارينا


المولات الماركات الغاليه
مجمع الصالحية
برج الحمرا
مجمع الرايه


عندك بعد مجمعات بالعقيله بس ما انصحك بالويكند لانها زحمة وتاخذ وقت بس علشان تطلع من الشارع
المولات هي
مجمع الغيت والبيرق
ومجمعات فيها العبايات واسواق الملابس الخفيفه وسلامتك

واذا ودكم بشي ثاني احنا حاضرين

الله يرضى لي عليك ويرحم اثنين جابوك
من شدة سردك وخوضك لتفاصيل الرحله لدرجة نظمتي لي جدول يومي انلخمت ويشهد علي ربك ان التمس الفايده من كل حرف خطته يديك يعلك ذخر ولاحرمك الله الاجر م قصرتي يمه
ولانستغني عن مشاركة الباقين

ولوو ماسوينا الا الواجب

حياك الله في الكويت
ماقصرت ام حسين بالاجوبه

يزاها الله خير ام حسين ما قصرت

اذا تبي انترنت اخذ شريحه لمدة اسبوع وكل ما دخلت الكويت شغلها ..
عندك شركة فيفا و زين ممتازين ..


اضافه على كلام ام حسين في سوق شرق حلو تقعدون على المرسى في المطاعم وايد حلوه القعده بس ترا جونا حاليا موسم سرايات مره مطر مره غبار والخ من الفصول ..


في متحف بيت العثمان مروا عليه زيارة وايد حلو راح تحبه الوالده و مقهى الشميمري على البحر صوب سوق شرق ..


و اذا توه من 3 اسابيع افتتح اكير متحف مركز الشيخ عبدالله السالم الثقافي عباره عن 6 متاحف واااايد حلووو للزيارة


وحديقة الشهيد بعد فيها متاحف حلوه


المتاحف اللي ذكرتهم مو ممله و راح تستانسون فيها كتغير عن الاسواق و المطاعم ..


وحياكم الله في ديرتكم ..

الله على الكويت