تجربي مع شركة enterprice rent car

رائد بومريم · 01-12-2018, 09:57 PM

السلام عليكم ورحمة الله وبركاته

حبيت اضع بين يديكم تجربتي مع شركة انتربريس لتاجير السيارات
Enterprice rent car

واعتقد ان شركة المو تتبعهم وممكن عندهم نفس السياسه

المهم ان كلامي بيكون على شركة انتربريس

بسم الله نبدا...

استاجرت من موقعهم الرسمي سياره مرسيدس فئة (CLA) لمدة يوم واحد

... (لانها لمدة يوم واحد قلت خلني اخذ مرسيدس اطرب نفسي .. والا في العاده اخذ ارخص سياره اذا كنت بستاجر السياره لعدة ايام )..

طبعا كان من موقعهم ارخص من موقع رنتال كار ..

بس فيه شي استغربت منه .. ماطلبوا مني بيانات الفيزا .. يعني مادفعت شي اون لاين فقط عبيت بياناتي ومعلوماتي الشخصيه وجاتني رساله على الايميل ان حجزي مؤكد ونحن في انتظارك

المهم..

الاستلام كان من تقسيم في يوم 28/11/2018 والتسليم كان بعدها بيوم في مطار صبيحه

قيمة التاجير 270 ريال لاني بسلمها في مكان مختلف عن مكان الاستلام والا المفروض يكون المبلغ ب190 ريال تقريبا لوكنت بسلمها في نفس المكان (المبلغ ماكان كبير ولا فيه فرق كثير عشان كذا اخترت المرسيدس عشان اطرب نفسي .. احسب نفسك داخل مطعم راقي شوي عشان تتعشى .. لان الفرق بينها وبين ارخص سياره تقريبا 130 ريال .. يعني قيمة عشاء)

المهم...
جاء وقت استلام السياره وفي ليلتها حلمت حلم غريب شوي وبعدين عرفت تفسيره وصار يضحك

الحلم هو : اني يوم رحت استلم السياره قالوا لي ماعندنا المرسيدس اللي انت طالبها بس بنغيرها لك وبنعطيك لكزس 430 LS

ومع مناقشات سريعه في الحلم مااذكرها وافقت واستلمت اللكزس
يوم طلعت اتمشى باللكزس احس انها ماتمشي .. بطيئه جدا ... الكزس مش كذا .. وش فيها ؟؟!! ادوس... ادعس ... مافيه فايده ...بطيئه جداً

المهم.. قمت من النوم ولا اعرت اهتمام للحلم ... قلت شكله نفس اللي يصير في الاحلام دايم تحس انك تبي تركض ماتقدر وتحس انك بطيئ .. قلت السياره نفس الشي .. اتوقع الكل فاهم

المهم .. سلمت الفندق وخليت الشنط عند الفندق وتوجهت بالمترو لمكتب تاجير السيارات في تقسيم .. انا كنت ساكن في شيشلي... دخلت واخذ اسمي وكان في انتظاري ... بمجرد عطيته الاسم عطاني بيانات الحجز ..

وقالي: انت حاجز مرسيدس لمده يوم واحد
قلت له: ايه نعم
قال لي : بس المرسيدس مش متوفره بنعطيك جيب بي ام دبليو اكس 5 (BMW X5) بدون ماتدفع اي زياده

لان هذه السياره تعتبر من فئة ارقى من المرسيدس ... لانها جيب
قلت : اوك
خلص البيانات وقال لي عطني الفيزا
قلت له خذ...
قال لي المبلغ مش راضي ينسحب من الفيزا بسبب انه لايوجد رصيد
قلت شلون ؟؟ فيها رصيد !!! كم بتسحب انت؟؟
قال لي 2370 ليره تركيه
قلت له : لا مافيها ذا المبلغ .. ليش انت بتسحب هذا المبلغ كله ؟؟
قال لي قيمة التاجير 370 تقريبا ليره تركيه وقيمة التامين 2000 ليره تركيه
قلت له : ليه 2000 ؟ كثير
قال : هذه سياره فخمه وهذا التامين اللي ناخذه عليها وبيرجع لك اذا رجعت السياره
قلت له : مكتوب على موقعكم انكم تاخذون مبلغ تامين من 100 ليره الى 500 ليره على اليوم الواحد
قال لي : لا .. هذه السيارات الرخيصه ناخذ عليها 500 اما فئة المرسيدس ناخذ عليها 1000 وفئة الجيوب مثل اللي بنعطيك اياه ناخذ عليه 2000 ليره
قلت له مش هذا المكتوب على موقعك
قال عاد هذا العلم اللي جاك .. عندك بطاقة غيرها او تقدر تحول فيها فلوس
قلت له : انا ماعندي ( انا كان عندي بس مابغيت اعطيه اياها لانها مش مسبقة الدفع نفس اللي عطيته واخاف يسحب منها ولا يرجع لي الفلوس)

كلم المدير حقه وقال له مو مشكله اسحب منه 1000 ليره كتامين يعني يطلع المجموع 1370 ليره

قلت له حتى هذا المبلغ مش متوفر في البطاقه

قال لي وش بتسوي؟؟ تبي اعطيك سياره رخيصه؟؟
تامينها 500 ليره مع قيمة التاجير 750 ليره تقريبا
قلت له : وش هي

قال هيونداي I20

جلست اقلبها في دماغي .. قلت مافي اليد حيله

قلت : اوك جيبها

اخذتها ومشيت وركبتها وسقتها وبعدها عرفت تفسير الحلم حقي ههههه

طلعت هي اللكزس اللي ماتمشي وبطيئه خخخخخههههههههه جلست اضحك

الملاحظات على الشركه
كان في السياره شموخ انا انتبهت لها واخذت لها صور بالجوال وفيه كسر في مرايا السواق الجانبيه لم انتبه له الا في اليوم الثاني

بعض الشموخ اللي في السياره مذكوره في التقرير وبعضها لا وهذه غلطتي اني ماشيكت التقرير قبل استلمه والكسر اللي في المرايا لم يكن مذكور في تقرير استلام السياره وانا ماانتبهت للكسر اللي في المرايا لان السياره كانت في مكان مظلم شوي .. مافيه لمبات وكنا نشيك بلمبة الجوال وعلى نور الشمس اللي يدخل من بعض الفتحات الموجوده

ويوم جيت اسلم السياره قالي وش هذا الشمخ ؟
قالت له قديم مش انا اللي مسويه ومذكور في التقرير
شيك على التقرير .. قالي مش مذكور
قلت له انا مصوره بالجوال
قال لحظه .. شيك الاوراق .. قال لي تامينك شامل .. مو مشكله .. خلاص تقدر تمشي.. ولا انتبه للي في المرايا ولا كلمني عنه او انه يدري بس عشان التامين شامل همشه

الشغله الثانيه قالوا لي بترجع فلوس التامين خلال ثلاث ايام والى وقت اعداد هذا التقرير لم تمر ثلاث ايام... بنتظر وبسوي تحديث على هذا التقرير..

شكرا لكم واسف على الاطاله..

الفراهيدي · 02-12-2018, 06:15 AM

الله يعطيك العافيه على التوضيح

والاهم الحلم تحقق ههههههههههههه

متابعين وننتظر وش يصير على التأمين

كتكات783 · 02-12-2018, 09:02 AM

أهلاً أبو مريم ...

الحمد لله على كل حال ... وفعلاً تأمين السيارات VIP بالألف وطالع ..

عموماً يكفيك أنك باسطنبول الجميلة لتعوّض ولتخفف عليك من حلمٍ لم يتحقق

شكراً لك لطرح التجربة وبانتظار وفاءهم باسترداد مبلغ التأمين لمعرفة مصداقيتهم ...

نـــواف · 02-12-2018, 11:39 AM

اهلا بك اخوي رائد

اشكرك على طرح تجربتك بالتفصيل مع شركة تأجير السيارات .. وبالفعل تجربة ثرية ومفيدة لنا جميعاً

جربت مؤخراً شركة الامو في الشمال التركي وكانت ممتازة ولم الاحظ منهم أي قصور وبالنسبة للتأمين عاد بشكل سريع وأتوقع تأمينك سيعود في الأيام بل الساعات القادمة

في حال ثبت أنهم لم يرجعوا لك التأمين فيمكنك تفويض البنك فسيطالبهم ويسترجع لك المبلغ ولكن يبدو لي أنهم شركة محترمة وسيعود لك

بالتوفيق

الرهيف · 03-12-2018, 10:41 AM

يعطيك خير الحلم ان شاء الله وبتوفيق يالغالي

ولازم تنتبة من شركات التاجير في تركيا بمعظمهم مشهورين بنصب والاحتيال وهذا مو غريبة عليهم ( البعض وليس الكل )

وكويس انك وثقت كل شي بالجوال علشان لا يدبسوك بانك انت السبب ويطير التامين عليك ويمكن تدخل في غرامات مالها اول وتالي

وهذا يكون درس لنا اذا تعاملنا مع اي شركة سواء في تركيا او غيرها

رائد بومريم · 06-12-2018, 03:06 AM

اشكركم جميعا على المشاركه

اخر التطوارات

ارسلوا لي على الايميل الفاتوره

وعلى حسب مايتضح لي ان قيمة الخصم كامل 200 ليره وشوي شامل قيمة اجار السياره وضرايب الطرق

والمبلغ اللي المفروض يرجعونه 400 ليره وشوي

بحط لكم الفاتورة

حركه حلوه
وممكن انها تطمنك شوي

بس الى الان مارجع لي شي على بطاقة الفيزا
وهذه الرساله جاتني على البريد امس يعني بعد ثلاث ايام عمل من تسليم السياره

رائد بومريم · 06-12-2018, 11:16 PM

اليوم تم ارجاع المبلغ كامل

يعني تقريبا بعد خمس ايام عمل من تسليم السياره

شي حلو وطيب وكويس

بس فيه شركات احسن منهم في بعض النقاط

فيه شركات ماتاخذ تامين
وفيه شركات تاخذ التامين كاش وترجعه كاش

انا افضل التعامل مع اللي ياخذون كاش.

نـــواف · 07-12-2018, 08:56 AM

اهلا بك

الحمد لله على عودة المبلغ وأعتقد فترة عودته معقولة جداً

بالنسبة للتأمين الكاش أو الفيزا فما فيه شك أن الفيزا أفضل لأن هذي الطريقة تعطيك كعميل أمان أكثر بحيث لو حصل أي مماطلة من الشركة أو اعتراض منك كعميل على المبلغ فتقدر تفوض البنك ويتواصل معهم أما الكاش فغالباً يكون موقفك كعميل أضعف من شركة التأجير

بالتوفيق

الفراهيديمعجبون بهذا.

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
إنترتت بلا حدود مع المودم في تركيا مع خدمة rent & connect ... محدث ماجد الفهد	ماجد الفهد	بوابة تركيا	125	07-08-2019 09:42 PM
من له تجربد لفندق دوبل تري من هيلتون اسطنبول	فيلسوف المقهى	تركيا	2	12-08-2016 02:34 PM