السلام عليكم

البعض الله يهديه يحب يصعب الأمور على الناس وخصوصا اذا كان المتلقي أول مرة يقدم على المكتب الموحد

فتلقاه يذكر طلبات غريبه عجيبه ويأكد على انها مهمه أو ينرفض طلبك

وهذي الطلبات الغريبة تتلخص في :

- ورقة التأمين لابد ما تكون مختومة بختم الشركة X
التأمين الآن أونلاين , يتم ارساله الى ايميلك وتطبعه وكان الله غفور رحيم
حتى ان البعض يقول اطبعها طباعه ملونه , وحتى هذا الكلام مبالغ فيه , اطبعها ابيض واسود وبس

- تحتاج ترجمه للبطاقة X
الترجمه تكون لتعريف العمل فقط , أما البطاقة فصورها عند أي مصور وكفى

- التعريف اذا كان باللغتين العربية والانجليزيه سيرفض X
هذا الكلام غير صحيح , يقبل بدون أي مشاكل بشرط يكون مختوم من الغرفة التجارية اذا كانت من القطاع الخاص

- لابد من تصوير صفحة رقم 3 من الجواز ( واللي هي صفحة توقيع صاحب الجواز) X
توقيع الجواز مهم جدا ولكن طلب صورة للصفحة رقم 3 غير صحيح

- ورقة check list مهمه X
غير مهمه وفي كثير من الأحيان يرجعونها لي ولا يناظرون فيها
هذي لك على شان تتأكد ان اوراقك كامله

- مخطط الرحلة X
هذي أوراق تدعم وتعزز الطلب ولكنها غير ضرورية

حتى ان أحد الاعضاء ذكر لأحد الأخوان أن لازم تكون فلوسه جاهزه يمكن ماعندهم صرف ويرجعونه !!! (هذا أسميه قمة التأليف)

الأمر مو مستاهل كل هذا التشنج والتشدد
وتلقا بعض الأعضاء المساكين بعد ما قرو من البعض من تخويف وتشدد وتعسير على الناس يحس انه داخل غرفة حرب مو داخل مكتب
وبعد ما يطلع من المكتب على طول يفتح موضوع ( تجربتي في التقديم على فيزا كذا وكذا )
والله ما ألومه من كثر ما قرا وسمع بعض الخزعبلات واللي خلته يشك انه راح يعطونه فيزا

الأمر بسيط وسلس وأسهل من السهوله بشرط تكون أوراقك كامله
واللي اغلبها تكون كالتالي :
الجواز الأصلي وموقع منك وصورة عن الصفحة الرئيسية
صورة بطاقة الهوية الوطنية
كشف حساب 3 شهور بالانجليزي ( سألت الموظفه هالسنه عن الرصيد قالت فرضت السفارة الألمانية يكون فيه مبلغ 25 الف ريال )
تعريف العمل بالانجليزي ,, واذا كنت قطاع خاص اختمه من الغرفة التجارية
نموذج التقديم وموقع منك
ورقة الموعد
حجوزات الطيران
تذكرة العودة
بعض السفارات تطلب صورة عن بطاقتك الائتمانية
البلد اللي طلعت منها الفيزا يكون البلد الأكثر اقامة ,, اذا تساوت الايام مع بلد آخر, طلعها من بلد القدوم

ودمتم بخير