السلام عليكم

ما بشرح كيفيه تعبئه النموذج لان الاخوان ماقصروا وعساهم على القوه وفي 3 مواضيع مثبته جداً مفيده وانا شخصياً استفدت منها
بعد الانتهاء من تعبئه النموذج والدفع تم اخذ موعد للبصمات والمقابلع
اخذت موعد يوم الاحد 8 سبتمبر الساعه 8 صباحاً
الساعه 7:45 صباحا كنت متواجده امام مبنى السفاره الامريكيه في منطقه السفارات في ابوظبي وعملت بتوصيه الاخوان تركت كل اغراضي في السياره وحملت مفتاح السياره فقط
الخطوه الاول في موظفه طلبت جوازي ودخلت بيانات الجواز وتاكدت اني بالفعل صاحبه الجواز وعطتني الاذن بالمرور ( طبعا اللي موعده 8:30 وطالع قعدوا على كراسي في الحر لين ايي دورهم
وقفت في صف وفي سيكيورتي يقول اللي عنده موبايل يغلقه لانهم بياخذونه
دخلنا غرفه مرينا على باب تفتيش مثل المطارات وعطيتهم مفتاح السياره وعطوني رقم
دخلنا غرفه ثانيه طلبت الجواز والابليكيشن وعطتنا موافقه ندخل للغرفه اللي بعدها
مرينا على بوابه تفتيش مثل اللي بالمطارات وعطتنا السيكيورتي رقم
الصاله كانت صغيره وتقريباً ممتلئه والكراسي خشب وغير مريحه
وصلت الساعه 8 صباحا وللحين ما فتح ولا كاونتر ،، على الساعه 8:15 فتح اول كاونتر وكان للمواطنين الامريكين
بعدها ب 5 دقايق فتح كاونتر وبدت الارقام تمشي
وصل دوري فسالني ليش رايحه امريكا ؟ قلت له سياحه وحولني على كاونتر 15 للتبصيم
وقفت في الصف بدون ارقام وصل دوري وٍاعطيتها الجواز وتاكدت من البيانات وبصمت
وقعدت انتظر دوري للمقابله، المكان غير مرتب ( عكس توقعاتي) في عامل ينادي الارقام للمقابله والانتظار في الصف
وصل دوري للمقابله وكان القنصل امريكي و جدا جدا مرح ، بدى بكلمه السلام عليكم وقالي احب البحرين وسولفنا شوي
وبعدها سالني
ليش تبين تروحين امريكا؟
الاجابه سياحه
متى ناويه تروحين؟
الاجابه 1 مارس 2020
وين تشتغلين؟
الاجابه ***
شنو شغلتج ونوع الوظيفه؟
الاجابه*****
قالي مبروك تمت الموافقه على طلبج وبتصدر الفيزا خلال يومين الى 3 ايام عمل
ما طلب مني اي ورقه او اثبات مع اني حامله معاي شهاده راتب وكشف حساب وصور شخصيه والابلكيشن ونسخه من اثبات الدفع
يوم الاثنين مساء بتاريخ 9 سبتمبر وصلني ايميل ان الجوازات جاهزه للاستلام
يوم الثلاثاء استلمت جوازي من البريد وفيه فيزا لمده 5 سنوات متعدده الدخول وصديقتي اماراتيه عطوها 10 سنوات متعدده الدخول

اتمنى تكون التجربه مفيده للاعضاء وباذن الله بنزل تجربتي في استخراج فيزا كندا وتعقيدهم

1000 مبروك تستاهلين
شكراً على طرح تجربتك للفائدة


بالفعل أخلاقهم عالية
ويحاولون تلطيف الجو بأسلوب حلو


الله يسعدك

اخر فرصه
شكرا اخوي على المرور