سافروا سريلانكا ياجماعه
مش عارف اذاي بلد زي دي مش مشهوره كبلد سياحي ع الاقل هنا في مصر زي تايلاند واندونيسيا وماليزيا
حابب اوصل تجربتي في رحله سريلانكا اللي كانت في شهر اكتوبر 2019 لاني بجد استمتعت فيها جدا ويمكن اكتر من بلاد كتير رحتها .
مبدأيا كده فيزا سريلانكا بتتعمل اون لاين وانت قاعد في البيت بتدخل ع الموقع الرسمي ليهم وبتملي بياناتك اللي هيا اسمك ورقم الباسبور وتاريخ الاصدار وتاريخ الانتهاء والمهنه وهاتنزل فين في سريلانكا ( ادخل علي بوكينج واختار اي اوتيل هناك واكتب عنوانه ) وبتدفع حوالي 40 دولار عن طريق اي كارد ليك وحرفيا تاني يوم بيتبعتلك ايميل بالفيزا وبتكون double entry لمده 30 يوم والفتره اللي ممكن تسافر فيها تقريبا 6 شهور .
الموقع تقدر تدخله من اللينك دا
https://eta.gov.lk/etaslvisa/etaNavServ?payType=1
ادخل علي حجز الطيران عن طريق سكاي سكانر او اي ابليكيشن تانيه حسب ماتحب واختار مطار كولومبو ورمزه ( CMB )
وحدد الايام اللي عايز تقعدها علي حسب المده المتاحه ليك .
انا كنت مسافر بالي وسيريلانكا مع بعض فمش عندي رقم فعلي لسعر التذكره لسريلانكا بس لكن لما دخلت وجربت سريلانكا بس لقيت انه ممكن احجزها بتذكره تبدأ من 6500 جنيه .
طيب مبدأيا كده بعد ماتحدد ايه البلاد اللي ممكن تروحها في سريلانكا ( انا روحت كاندي ونوراليا وكولومبو ) بس فيه كذا بلد تاني حلوين جدا ممكن تروحوها علي حسب وقت رحلتكم
اهم حاجه بقي علشان فعلا تستمتع بسريلانكا حدد طريقه المواصلات اللي هاتاخدها هنا ( فيه 3 انواع )
القطر ( بتتفرج علي البلد كلها والمناظر تحفه بس عيبه انه بطيء ومش نضيف وزحمه جدا يعني لو معاك شنطك هاتتعب فيه جدا )
الاتوبيسات ( وسيله رخيصه برضه بس ليها مواعيد معينه اعتقد بالساعه ولازم لو هاتسافر بيها من بلد لبلد تروح تركب بدري لان البلد فعلا بتنام من الساعه 7 او 8 بالكتير بالاضافه انه لو معاك شنطك هاتتعب جدا في السفر من مكان للتاني )
عربيه خاصه بالسواق بتاعها ( ودي فعلا اسهل واحسن طريقه ) وحابب اتكلم هنا بالتفصيل
السواق اللي عرفته عن طريق الجوجل اسمه روشان ودا هو رقمه +94774954991 اخدت رقمه وكلمته ع الواتس اب واتفقت معاه علي البرنامج اللي هاروحه وكام تكلفه كل يوم هناك هو عنده شركه تاجير عربيات بالسواق بتاعها وبعتلي هناك في المطار السواق اللي هايكون معانا واسمه سمير
الراجل دا ياجماعه بجد هو اللي حببنا في سريلانكا لدرجه واحنا ماشيين من المطار كنا حاسين اننا سايبن صديقنا في البلد دي
انت حرفيا كده معاك مرشدك الخاص مش مجرد سواق وبس كان بيدخلنا ارخص الاماكن هناك ويقدر يتفاهم مع اي حد من البلد ووفر علينا كتير بجد في الرحله بالاضافه انه علشان الجو امطار هناك مش هاتشيل هم انك تدور لسه علي اذاي تروح الحته الفلانيه في الجو دا , بالاضافه لو حبيت تعمل اي حاجه او تشتري اي حاجه سواء هدايا تذكاريه او اكل او اماكن تغير العمله هايوجهك للمكان من غير اي تعب .
مبدأيا كده اليوم كنا بندفع فيه 50 دولار بس وملكش دعوه بأكل السواق او اقامته وبيكون معاك من اول اليوم لأخره ,
وسمير لما عرف اننا من مصر قالنا انتوا اول ناس اشوفهم هنا من مصر و اتفق معانا انه اللي هايجي بعد كده من مصر هايتفق معاه انه اليوم يكون ب 40 دولار , كلموه بجد اللي رايح هناك ودا رقم الواتس بتاعه +94 70 278 7665
الاسعار هناك بقي
عمله البلد هيا الروبيه السريلانكي وتقريبا كده اي حاجه هناك اقسمها علي 11 تديلك قيمتها بالجنيه المصري .
احسن سعر للصرف هاتلاقيه في المطار بدلنا الدولار ب 180 روبيه واشترينا خط نت واتصالات لشركه Dialogue ودي احسن شركه هناك في تغطيه شبكتها لسريلانكا كلها كان الخط ب 1300 روبيه
التبس هناك مشهور جدا علشان كده خلي معاك فكه بحيث تدي 200 روبيه تبس لاي حد تعب معاك .
ودي اهم الحاجات اللي ممكن تروحها هناك
في الطريق لكاندي
حديقه ميتم الافيال سعر الدخول 3000 روبيه وافضل وقت للزياره من 9:30 لغايه 10:00 الصبح او من 1:30 لغايه 2:00 الضهر ممكن تأكل الفيل ب 300 روبيه ومتاح هناك لو حبيت تشوف الافيال وهيا في الميه وتاخد شاور معاها .
حديقه البهارات الدخول مجانا وبيجي مرشد يشرحلك انواع النباتات المختلفه اللي بتستخدم في العلاج زي الام العظام والبواسير والتخسيس وغيره وفي النهايه لو حابب تدخل الصيدليه تشتري كورس معين لاي مرض .
في كاندي بقي نزلنا في اوتيل علي جبل بيشوف المدينه كلها ببحيره كاندي منظر يخطف العقل فعلا كان اسمه
VENDOL SKY RESORT تقريبا سعر الفرد في الغرفه الثلاثيه كان في الليله ب 2310 روبيه .
ممكن تروح بقي ايه في كاندي ؟؟
بحيره كاندي وتستمتع بالمنظر هناك
تدخل تتفرج علي عرض فلكلوري رقصات شعبيه للبلد الدخول ب 1000 روبيه
معبد دادلا ماليجاوا الدخول ب 1500 روبيه ولو عايز مرشد معاك في المعبد بتدفع 1500 روبيه ليه
في الطريق لمدينه نوراليا روحنا الاماكن دي
شلال رامبودا كان تذكره الدخول ليه 50 روبيه
مصنع للشاي والمزارع بتاعته الدخول مجاني وبيتقدم شاي مجاني برضه وبيجي مرشد يشرحلك طريقه صنع كل انواع الشاي وبيلف بيك جوه المصنع وفي النهايه بتدخل تشتري شاي لو حابب من هناك
هناك في نوراليا بقي ( دي مدينه مرتفعه عن باقي المدن طول الطريق بيكون كأنك بتطلع جبل علشان كده درجه الحراره كانت 14 يعني لازم تاخد جاكت معاك , طراز المباني كله الطراز البريطاني لانها اتأسست علي يد البريطاني صيموئيل بيكر )
تقدر تروح هناك
بحيره نوراليا الدخول ب 200 روبيه وتقدر تاخد قارب لمده ساعه يلف بيك ب 3000 روبيه
مزرعه الفراوله الدخول ب 200 روبيه
حديقه سهل هورتون ( منتزه نهايه العالم )الدخول ب 3000 روبيه
كولومبو ( ودي عاصمه كاندي مختلفه جدا عن باقي المدن بتختفي فيها الطبيعه وبتظهر فيها الابراج والمدنيه اكتر ودي قضينا فيها اخر يوم علشان هيا اقرب مدينه للمطار )
ممكن تروح فيها مولات لو بتحب التسوق زي مول MAJESTIC CITY
ومول CRESCAT BOUEVARD ( يعني بصراحه ماستمتعتش هناك فيها زي المدن التانيه )
طبعا انت ممكن تقرا عن بلاد تانيه زي بنتوته وجالي ونيجومبو وسيجيريا وتشوف لو حابب تروح اماكن هناك وتعمل انشطه زي الرافتنج او المساج بالسمك او تطلع صخره سيجيريا وتشوف المنظر من فوق علي حسب وقت رحلتك وممكن تظبط دا مع سمير لأنه هايفيدك بجد قبل حتي ماتحجز الفنادق من بوكينج علشان ماتضيعش وقت في الطريق رايح وراجع للاوتيل وبرضه ممكن هو يحجزلك الاوتيلات لما توصل هناك وهاتكون ارخص من بوكينج بس انا حبيت اريح بالي واكون حاجز الأوتيلات من هنا .
اسعار الاكل رخيصه جدا ودا طبعا لأن سمير كان معانا وهو اللي كان بيودينا ارخص الاماكن وكل شويه يقولنا Let's try street food وقالنا انه هو هو نفس الطعم بس فيه اماكن تانيه بتزود الاسعار للضعف
الاكل اغلبه ارز بالكاري مع الفراخ اللي مليانه شطه وبهارات وعندهم عيش زي العيش السوري بيقولوا عليه روتيت ممكن يكون لوحده وممكن بيكون محشي حاجات كتيره بالاضافه طبعا للمشروب الرسمي الشاي السريلانكي .
كانت اسعار الوجبات مابين 200 الي 500 روبيه وفيه اماكن اغلي من كده لكن المجمل العام هو دا .
جربوا الفاكهه هناك زي الجاك فروت والاناناس والبابايا وفيه فاكهه عباره عن فياجرا طبيعيه وجوز الهند انواع كتير هاتعجبكم وفيه انواع اكيد مش هاتعجبكم حتي الفاكهه المعروفه هنا زي الموز هاتلاقوه هناك مختلف في الشكل والطعم .
سريلانكا بجد تحفه جدا ومش واخده حقها زي بلاد كتير سواء في طبيعتها اللي بجد مش هاتمل من اللون الأخضر والجو الرائع بتاعها وامطارها وناسها اللي مبتسمين دايما ليك ومحستش انه بيحاولوا يستغلوك ( يمكن شويه في كولومبو كانوا الشحاتين منتشرين بشكل كبير )
اخيرا طبعا هما بجد كانوا متضررين جدا من التفجيرات اللي حصلت في شهر ابريل اللي فات لانه اغلب البلاد كانت بتحذر مواطنيها انهم يروحو سريلانكا ودا اثر بشكل كبير علي السياحه هناك لكن في النهايه هايفضل دا حال كل البلاد اللي بتعاني من التطرف لكن انا محستش انه فيه هناك اي حاجه مقلقه او تخوف وخصوصا لانه كان معانا سمير اللي سهل علينا حاجات كتير

شكراا لك لذكر تجربتك
ماشاءالله تفاصيل مفيده والاسعار حلوة للي بيعرف الميزانيه
الفواكه الاسيويه بعضها لذيذ وخاصه الاناناس
استمعتنا بالتقرير بارك الله فيك

شكرا علي التقرير الى ذكرنا بايام جميلة فى سريلانكا

ويمكن مشكلة سريلانكا هى الطرق الى تاخذ وقت طويل للانتقال من مدية الي اخري

رغم جمال الطبيعة وبساطة وطيبة الشعب السريلانكي لكن تبقى الطرق والمطاعم وارتفاع اسعار الفنادق ال5 نجوم

هم سبب ان البلاد مو ماخذة حقها سياحياً كما تستحق