السلام عليكم والرحمه

محدثكم بومحمد باقص لكم قصه شهر عسل في زمن الكرونا

اول شي ماكنت مخطط اني اكتب موضوع بس عقب المشاكل الي صارت لي
قلت لازم اكتب موضوع

ثاني شي تم التخطيط لشهر عسل وبما انه شهر عسل فقلت يكون شهر
الميزانيه تسمح هذا مخي يقول
الحمدلله تم اختيار المناطق على حسب خبرتي بالسفر في شهر سبتمبر
حق شهر نوفمبر

على طيران الاماراتيه من البحرين الى مدريد ومن فيينا الى البحرين
اسبانيا — مدريد و جزيره تنريف و برشلونا
سويسرا — انتر لكن
النمسا — فيينا

وعلى حظي الحلو قبل لا اسافر 15/11 تم فرص اغلاق للنمسا
طبعا كرونا و كل شي متوقع الا ان قبل السفره باربع ايام تقفل
طبعا انا كنت ساكن بالماريوت النمسا فقلت ليش ماتاكد يمكن كلام بس
للاسف كلمتهم وقال لي الكلام صح وعطني رقم الحجز اكنسله
طبعا لي حين انا مكابر لاني باسافر مدريد تاريخ 20/11 و النمسا بتكون 15/12 فباقي شهر
المهم عقبها بيومين زلزال في جزيره لاس بالماس من الخرعه ابي اطير اليوم قبل باجر ع الاقل ادش مديد
وعقب يصير خير بس تذكرت من خارطه اسبانيا ان الجزيره ذي بعيد عن اسبانيا ومابروح لها
المهم كالمتوقع من واحد يبي يسافر يجهز كل شي

نسخ من التطعيم الكرونا
نسخ من فحص pcr
نسخ من الكود حق السفر الى اسبانيا spth
نسخ من الجواز والبطاقه والتذكره
خذني الحماس بس كنت ابي اسافر بما ان اخر عهدي بسفر كان 2019 قبل كورونا


المهم تاريخ 20/11 سافرت والحمدلله من مطار البحرين الدولي الى مطار دبي الدولي ترانزيت تقريبا 16 ساعه
نزلت دبي وسكنت في فندق قريب من المطار لان اليوم الثاني باحتاج ارجع المطار
خذت تكسي من المطار لي الفندق 10 دقايق بالزحمه
طبعا انا عارف لان كل سفره اخذ ترازيت طويل اريح بدبي دار زايد
الفندق 4 نجوم 🌟
رابط بوكنق

http://www.booking.com/Share-bJr3ShD

المهم الفندق قبل كان معاملتهم و تعاملهم احسن بس يضل حلو انه جريب من المترو
طبعا لازم تمر دبي مول تتسوق سريع سريع والمترو يبيله شي بسيط


الصوره من سماء مدريد ماشاء الله
المهم رجعنا لي رحلتنا الى مديد
بنتم فيها من تاريخ 21/11 لي تاريخ 26/11
دخلنا مطار دبي وكلمتوقع يسالونك عن تطعيمك وفحصك و جوازك

وبس رحله كانت طويله لي مديد 8 ساعات و نص تعب تعب
وصلنا مديد وطلعنا من الخرطوم
وانا يدي ع قلبي بس ابي اطوف ما يقولون سكرنا الديره ول شي
وصلنا لي الجوازات هني انا توترت وعطيت موضف الجوازات الجوازات
ول يقول 👀 بصم قلت ها يقول حط صبعك هني مادري شيبي
مع اني فهمت بس توقعت ان بيرجعني ماعرف ليش
المهم بصمت وختم الجواز هني انا ارتاح 💓 قلبي
رحنا بندش الديره انطر احد يبي pcr او فحص او اي شي ابي استفيد من الي دفعته
المهم محد طلب الفحص كل الي طلبوه الفورمه الي بالموقع spth
موضعها سهل تدخل تملي كل بياناتك وخلاص كذا دخلت اسبانيا


صوره من الكود للبرنامج

كنت ابي اخذ سياره اجار بس كل مره افكر يطلعون لي الشعب المعارض
ليش سياره السياره حوادف رخصه قياده ماتعرف تسوق مع الاجانب صعب 😥
المهم خذت تكسي 🤧 من المطار
فتحه العداد 30 يورو 💶 لي الفندق في قراند فيا
فندق 4 نجوم 🌟 في وسط قراند فيا
السعر كان 335 دينار بحريني = 788€
http://www.booking.com/Share-3hoCXq



اطلاله الفندق الي على قراند فيا صاير بين زارا ومانقو مكان استرتيجي حق السوق

الفندق مايسوه من ناحيه
مافي تكيف ول فيه عزل
اول يوم اذا اسمع خطاوي احسها داخل الغرفه من الخرعه اطير لي الباب
طبعا انا موفر فيه لان رحلتي مو هنا رحلتي بعدين

مدريد

اوصفها بكلمه ~> الفاتنه

مدريد زرتها في 2017 بس كأني ماشبعت منها

وانتمشه اول يوم في قراند فيا شارع ول اروع من الماركات والمحلات
مدينه جميله مافيها مسافرين عرب كثير <في السفر اتعمد احاول ماروح بموسم الخليجين> مابي اصادف العرب ماخذ راحتي
احس يفهموني 😂
المهم مدريد او اسبانيا بالذات وقت السوق يبتدي من 11 الضهر لي 10 بالليل لاتتفلسف وتسوي باقوم 8 الصبح
هذي مو لندن هذيله عرب بس جوازاتهم اوربيه


ارتحنا في ستاربكس مع الاجواء الشتويه

الشعب روعه ومتعاون ياحبي للاسبان

وزنا متحب ريال مدريد — سنتياقو برنابيو —
في شي قبل لاتروح بالباص نفس حالتي وواقف بالزحمه لي وصل دوري


تره بالكورونا احين لازم تحجز اون لاين 😥
المهم عدت على خير و حجزت اون لاين وانا واقف ودخلنا
ولله وشحلوه وشزينه نفس البليستيشن
😂 فعليا لما تشوف الملعب بالبليستيشن بالوانه هذي الواقع مو عندنا

المهم ورحنه حديقه روتيرو عجيبه حق تصور وهل حركات

الاجواء الخريفيه العجيبه
اي شخص مسافر على مدريد في اي وقت من السنه لازم تروح حتى لو مالك في الحدايق بس كميه اكسجين
وراحه بال وناس تجري وناس تلعب اجواء خيال
طبعا الجو بارد فالسوق كان بالنسبه لنا متعب بالذات ان داخل المحل دافي وبرع برد
قلنا لازم نروح مكان حلو جذي
دورنا بالنت وحصلنا مجمع نفس مجمعاتنا هني اسمه
المجمع فيه تزلج على الجليد ⛷ نفس امارات مول بس ماعرف ماحبيت اتفشل بشهر العسل
المهم مجمع حجمه كبير وحلو طابقين دخلنا المجمع 6 على اساس ان بنتسوق ساعتين زمن
دخلنا لقينا بولنق فقلت ليش ما اوري زوجتي ابداعاتي بالبولنق بس ولله وماطلعنا الا لما قفلو 😂
الي بيروح المجمع بالتكسي يحاسب لان وقفنا برع تقريبا 15 دقيقه ومافي تكاسي

وبس مدريد كانت بصمه وصولي الى اسبانيا مو الغايه منها شي مثل ماقلت

طبعا من اول يوم وانا اقول لزوجتي الجزيره و الجزيره
ويه اليوم الموعود 26/11 بنسافر الى جزيره تنريف جزيره من جزر الكناري
الى غايه 2/12
سافرنا على طياران داخلي لمده 3 ساعات سعر التذكره ذهاب واياب كلفني مع الوزن 170 دنياو بحريني تقريبا 1700 ريال سعودي
الطيران الداخلي متعب اذا عندك وزن 🤧



المهم ان وصلنا المطار 6 الصبح ورحلتنا 9 متلهف وطبعا ماتطول وتدخل المطار
ارفع راسي على القيت gate مافي الا قبل ساعه من الرحله

هاي وضعي بالمطار

المهم وصلنا الجزيره الي اقول عنها حلوه و دافيه ومافيها شي الا الجو مطر مطر ☔


😂 قلت شكلي جبت العيد وبرد بعد
خذنا تكسي لي حين ماتعلمت الدرس بس طلع علينا 10 يورو بس
وصلنا في 15 دقيقه والمطر ماوقف الفندق كان شكله يشجع الصراحه
خمس نجوم وتصنيفه حلو
http://www.booking.com/Share-mRRDsd

السعر لسويت مطل على البحر كان سعره 600 دينار بحريني تقريبا 6000 ريال سعودي

الفندق بختصار روعه ماحطيت صور لان نفس صور بوكمق بالضبط

حجم اللوبي جبار كبير كبير
من اول ماتوصل ياخذون اغراضك وصلنا 12 الضهر والدخول 3 العصر سوو لنا جيك ان بس الغرفه ماجهزت
تقدر تروح اي شي بالفندق من جم او سبا او مسبح او مطاعم

الفندق فيه 5 مطاعم
ايطالي وهندي و بريطاني و البوفيه مالهم و سناك بار
يعطونك تجرب من المطاعم الايطالي والهندي و البريطاني فري
وسناك بار و البوفيه فري
بس المشكله مافي شي ناكله منهم كله خنزير قربلهم الله فكان اكلنا على سناك بار

وفيه حق الاطفال ايودونهم عنك حق تتونس و في حق المراهقين العاب تسليه تنس طاوله و العاب خفيفه

المهم نروح حق المهم الغرفه
مجنونه مو طبيعيه خيال منظرها على البحر الازرق و حجم الغرفه روعه و الحمام عزكم الله كبير
كان كل شي حلو فيها بس
اي لازم بس العزل مو 100٪ يعني كنا نسمع الي يمينا لان كانو مزعجين
بس صوت الموج وانت بالغرفه و كل شي روعه

المهم الجزيره عباره عن فندق اول يومين لان اي شي نبي نروح كان بعيد او تاكسي

في الفندق عندهم مكتب تحجز رحلات بس لازم قبل بيوم
وانا عن نفسي ماعرف احجز قبل بيوم لازم نفس الوقت
امانه المشي ما انصح فيه لان كان صعود ونزول المهم
تعبت نفسيا و اجرت سياره اليوم الثالث لي اخر يوم 2/12
سعر السياره كان تقريبا 150 دينار بحريني وتامين 100 يورو
لي حين مارجعوا التامين شركه canary car تعاملهم زين ورجع التامين عقب اسبوع
السياره كانت وكاله ماشيه بس 500 كم
ومن خذنا السياره صارت الجزيره لنا


باختصر لكم الجزيره
الجزيره عباره عن هاي وي سرعه الشارع 120 كم يلف على الجزيره
وبنص الجزيره جبل ارتفاعه 3000 متر اكبر جبل في اسبانيا
الرحلات والحدايق على الشارع الرئيسي

رحنا حديقه حيوان و حديقه قرود 🙊 طبعا مو نفس باقي الحدائق لا تدخل مع الحيوانات عادي وتاكلهم
و كارتنق سيارات لازم تغير الجو
كان الصراحه شي عجيب خصوصا ان زوجتي اول مره لها 😏 وانا افتر عليها واطلع مهاراتي
و المطعم الهندي — اي المطعم الهندي مع الجكن برياني تحس انك بالديره وتكلمه عربي ☺
الي يحب الاسبايسي بيحس بالمعاناه في اوربا لان مافي طعم اكلهم فتحتاج هندي سبايسي 🌶
طبعا صار العشه كل يوم هندي لمده 4 ايام يبتعد عن الفندق 1500 متر يعني بالسياره 3 دقايق بالمشي 20 دقيقه لان صعده ونزله

طبعا عشان الهندي كل شي عادي


خذنا طياره هوليكبتر
في 4 خطوط سير
10 دقايق
20 دقيقه
30 دقيقه
40 دقيقه
بس احنه خذنا 20 دقيقه قلت اخاف ماتعجبني الرحله
بس كان الوضع امان << محدثكم مهندس طيران واعرف شاقول >>
يعني اجرائات السلامه في الهنقر و الطياره مسوين لها سيرفس وباين انها تشتغل شي بسيط
الطياره حق 3 اشخاص و لازم وزن معين
و اكثر من 100 كجم مايدخلونك مهم حق الي بيروح لان بعيد شوي

المهم خلصنا من الجزيره ونصيحه اذا تبي تروح المالديف وماعندك مبلغ حلو روح جزر الكناري 🇮🇨

لازم اقول شي ضروري انا رحت على الساحل وكان جميل وفيه الالعاب المائيه
جتسكي / الموزه / البراشوت / الرحلات باليخت
بس ماكان عندي وقت
ورحنا مثل المخطط الى برشلونا من 2/12 الى 11/12
هني انا بالخطه اخذ فندق شي بسيط 4 نجوم وياليتني ماخذت
http://www.booking.com/Share-yek9Bda

سعره 250 دينار بحريني

مكانه الفندق ممتاز وفيه حمايه 24 ساعه دايم اخذ فندق فيه حمايه 24 ساعه وفيه عزل قوي و فيه تكيف
هذي ميزات بس العيوب ضيق يعني الغرفه عباره عن سرير الاغراض ماتنحط داخل الغرفه ابد و اللوبي حااار ماعرف كيف يستحملون

يعني مثبتين التدفئه على24 درجه الحراره ليش و غير القرص الي بالفراش
المهم برشلونا
يبيلها قعده اذا عجبكم الموضوع وتبون اكمل عن شالي صار بالكرونا وغير اتجاه الرحله من سويسرا لي فالنسيا خبروني
لاني احين وقت اني اطير وارجع الديره ☺

و عليكم السلام و رحمة الله و بركاته ..

حياك الله يا بومحمد ...

ما شاء الله مقدمة و مدخل جميل لأحداث تقرير مفصل منتظر منك قريباً

بالتأكيد .. نرغب في التقرير المفصل و المدعم بكامل الأحداث و الصور

ترجع بالسلامة ..."نحن بالأنتظار"

اسف على التاخير بس ماقدرت اركز من رجعت من اسبانيا

وين وقفنا صح برشلونا

على حسب كل شخص تقدر تستمتع ببرشلونا براحتك
لو تحب التاريخ بتلاقي القلاع و الكنايس التاريخيه
اذا تحب الطبيعه والشواطئ بتلاقي فيها
تحب التسوق والماركات الرخيصه او الغاليه بتلقى فيها

المهم رحلتي كانت مدتها 7 ايام
وعلى حضي كان اول يوم يتطبق الدخول بالبرنامج ( توكلنا - مجتمع واعي …. الخ ) كان يوم 3/12 وهو ثاني يوم لي
بس كانو يقبلون الدخول و خل عندك نسخه من التطعيمات ورق احتياط

طبعا بعض العمال يبي يسوي سكن حق الكود ( الكود تبع مملكه البحرين ) واقول له مايصير اقرا هذا مو من هنا
بس لازم يقول لك اسوي (( حافظ مو فاهم ))

اول يوم لازم تمشيه في لارامبلا من على المرفى لي عند ساحه كاتلونيا


احلا محل يبيع عسكريم في لارمبلا
في منه محلين محل جمب ماكدونالز و محل ريال مدريد الرسمي يكون داخل الشارع
ومحل عند ساحه كاتلونيا جمب مطعم فايف قايز

اليوم الثاني رحنه سوق الخضرا
نشتري منه عصير 🥤 و خذنه من عنده توت لذيذ 🤤
وبعدها قلنا بنروح التلفريك بس للاسف كان مغلق لان رياح قويه
المهم بعد ماوصلنا خذنا تكسي يطلعنا لي القلعه اخر التل
مناضر روعه بس برد
المهم في النزله ( لحد يغلط غلطتي ) نزلنا مشي
من الساعه 3 العصر واحنه ننزل طبعا طريق منحدر في البدايه كان الجو حلو وفي طاقه
عقب صار المنحدر قوي الي ماتقدر توقف وضلم الوقت وصار الوضع مايطمن
محد بالشارع بس صوت الهوا وهو يطقك من كل اتجاه
لي الساعه 6 واحنه ننزل هني حسيت بالخطر وادور اي تاكسي ياخذني بس ويوصلني الفندق

امانه يا جماعه لحد يسويها وبالذات وهو معاه حريم حتى لو قالت لك اوكي انت ارفض
طبعا زوجتي رفضت انا اقنعتها 🙈

بس رجعنا الفندق بالسلامه بعد ماحصلنا تكسي مار بالغلط 😅
ريحنا في الفندق وطلعنا تعشينا من سب واي

اليوم الثالث
كنا حاجزين رحله لي مدينه الملاهي
Portaventura
https://www.portaventuraworld.com/en/portaventura

مع شركه جولي للسياحه // لحد ياخذ منهم ماعندهم الا باص وتوقيتاتها متعبه
كان متفق نروح نقطه التجمع الساعه 9 الصبح
وصلنا بالضبط 9:01 نجوف الباص وهو يمشي رحت ركض له ابي يوقف
كلموني قالو لي خلاص مشى الباص تبي الاسبوع الجاي اقرب موعد
المهم انا مسافر الاسبوع الجاي وين اصرفها ذي
المهم رحنه بالقطار والله وكيلك ساعه ونص واقفين علي رجولنا

قطار برشلونا - فالنسيا

المهم مده الرحله ساعه ونص واحنه مارتحنا من 8 الصبح لي 11 الضهر
طبعا 3 ايام كل يوم متعب اكثر من الثاني الفندق والحبل واليوم ركض من مكان لي مكان
وصلنا الملاهي
الملاهي فيها 4 العاب او 5 العاب حق كبار
وكل لعبه احله من الثانيه وذا تاخذ فاست باس بتركب اول واحد واول قاطره غالي جدا جدا تقريبا 180 يورو كلفني الفاست من غير التذكره لشخصين

طبعا اول مابي اركب يقولون لي ممنوع القبعه قلت معليه // ول تقول لا بعد زوجتك
هني انا قلت ان شاء الله يفهمون يلست اشرح لهم هاي حجاب مو قبعه مايصير وهم لا الا تفصخ الحجاب
انا تنرفزت وقلت باركب غصب عنكم انا دافع تقريبا 300 يورو واخر شي كذا
المهم نقاش طويل عريض و صارت الزحمه ولويه والكل يشوف شفيهم تخيلو انا جالس باول قاطره وواقف ومابي اطلع
المهم بعد شوي جابو شي مثل الحجاب مال الصلاه بس قصير وصاير نفس البلاستك الخفيف كذا حق الحريم

والمشكله انه كان عندهم بس مايبون يتعبون روحهم

صراحه اللعبه كانت وايد حلوه و بس اسلوبهم كان متعب خصوصا اني ماريحت من الصبح
المهم خلصنا من الالعاب الساعه 6 وفي نفس دزني لاند بس بالبحيره يسون نفس الشخصيات بالمراكب وشي حلو والعاب ناريه
المهم 6:30 طلعنا نبي نحصل الباص حق نرجع لايمشي عنا

كل الشركات والباصات موجوده الا شركه جولي للاسف
ونجوم مجموعه جالسه على الارض سالناهم قالو لنا اي احنه نفس الشركه والشركه عندها باص واحد بس
وتاخر علينا وصل لنا 7:10
المهم ركبنا الباص وكل جسمي يعورني من الصبح لي المغرب وانا مو مرتاح

الملاهي اعطيها 5 من 10 لان كبيره ومافيها العاب مثل الي متعودين عليه وكان الجو بارد متعب 😪

اليوم الرابع
يوم الراحه الصراحه بس رحنه نتسوق شوي ونفكر لان سويسرا بعد صكت بوجهنا و هل نرجع الديره او لا
وكان لازم نغسل الثياب اي نعم
دايم في السفر اخذ كميه ملابس الي تكفيني لاسبوع الى اسبوعين بحيث يا اني اشتري ثياب واتخلص من ثيابي القدام
او ادور مغسله واغسل ثيابي

المهم في مغاسل كثيره هاي الي اكتشفته نظام المغسله اخدم نفسك بنفسك حط ثيابك بالغساله وتروح للمكينه تدفع وتشتغل
ونفس الشي النشافه

اليوم الخامس
بعد تفكير طويل قلنا نروح سكه سفر بالسياره فالنسيا وملقا والاندلس بشكل عام
حجزنا فندق اون لاين وخذنا سياره من شركه
Sixt لتاجير السيارات

نصيحه انا اكثر من مره احجز عن طريقها بس اون لاين ودايم اخذ ديزل لان البترول غالي وبالحجز ياخذون علي مبلغ الديزل
والgps بس لما رحت سالت الموضف قال لي سياراتنا تقريبا 90٪ ديزل وفيها جهاز gps فوفرت مبلغ وقده

خذت سياره Audi A4 Disel
كان سعر الاون لاين 450 دينار == 4500 ريال سعودي
الحجز طلع علي 320 دينار == 3200 ريال سعودي

وبعدها رحنه متحب الشوكلاته


هاي ثاني مره اروحه مكان حلو وتغير جو مناسب
بس حق الشخص الي مايحب هالنوع من المتاحف انصحك تاخذ من عندهم هوت شوكلت و شوكلت

سادس يوم

كان يوم تقفيل الشنطه لان اليوم الثاني متوجهين الى فالنسيا وطلعنا نتمشه
وشفنا السكوتر وعيونا عليهم وكان في خليجين نشوفهم على الاسكوتر نبي نسالهم بس يبتعدون بسرعه
المهم رحنه اجرنا من الشارع ساعتين ب30 يورو سكوترين يعني الواحد ب15 يورو وتامين 100 يورو

طبعا السعر مبالغ فيه وبعدها حصلنا يوم كامل بنفس القيمه
المهم استمتعنا وكنا نلف على الشارع حق الدراجات روحه ورده

اليوم السابع
السفر الى فالنسيا

مده الرحله كانت 4 ساعات تغدينا الساعه 1 الضهر وتحركنا والحمدلله الشارع واسع وجميل ومناظر جميله


الحمدلله على السلامه

والقصه تبتدي في فانسيا وعشقي للمدينه الي مايتم التركيز عليها في اسبانيا

ان شاء الله لنا عوده قريبا وحق الي بيسافر اسبانيا حط ببالك فالنسيا

مبروك الزواج والله يهنيكم بشهر العسل
توقيتكم للسفر بهذا الوقت كان بداية اوميكرون ولهذا السبب كانت اوروبا تسكر ورا بعض المهم انكم استمتعتوا واستانستوا
بانتظار تكلمنا عن فالنسيا