السلام عليكم ، حاب اطرح موضوع عن افضل طيران في رايكم او عن تجربة الي امريكا ،
سوف اطرح تجاربي لكم لانه صراحة هناك اختلاف في الاسعار والخدمات قبل وبعد جائحة كورونا ،
* الخطوط السعودية خدمات داخل الطيارة ممتازه وخصوصًا وجود المصلى بالطائره ولكن المطارات وبحكم احنا اهل الدمام مافيه طيران مباشر لازم عن طريق الرياض او جدة وليست هنا المشكلة ، المشكلة انك تطلع رحلة داخليه بعدين تاخذ عفشك وتتوجه الي الصاله الدولية تدخل العفش وتقص البوردنق وهذا متعب جدا خصوصًا اللي عنده اطفال وخصوصًا اذا كان مريض ومن ذوي الاعاقه مع العلم انها تعتبر رحلة دولية من الدمام الي امريكا
* الخطوط الامارتية ممتازه و الايرباص 3800 روعه ولكن وقت الترانزيت بالمطار طويل جدا خصوصًا عندك بعد رحلة من 13 ال 14 ساعة
* طيران الاتحاد جيد ويمكن ميزة تخليص اجراءات السفر من مطار أبوظبي اللي تميزهم
* الطيران القطري جيد جدا وقت الترانزيت بالمطار مناسب جدا ولكن يعيب عليهم ولا يزعلون علي الاخوة في قطر مطار حمد مزحوم جدا والإجراءات شوي حوسه وللاسف ما تشوف مسؤل قطري تتفاهم معاه العماله كلها اجنبيه وصعب التعامل معهم خصوصًا الجنسية الهنديه وتغير مستواهم في الخدمات قبل وبعد كورونا يعني العام الماضي وأحنا راجعين من امريكا 3 دورات مياه اكرمكم الله خربانه واللي زاد الطين بله الكرسي اللي حاجزه كان مكسور مع العلم اني دافع فرق والمضيف قال مافيه امكانية تغيير
* امريكان إيرلاينز بالشراكة مع طيران الخليج عاديه ، مسافر ساعه او 14 ساعه نفس الخدمه ويمكن تكون معدومه
* اللوفتهانزا ايضا طيران عادي ينطبق عليه ما ينطبق على الامريكان ايرلاينز
السنه هذي بنسافر ومحتار اي خطوط ابغى تجاربكم ورايكم واي الافضل…. آسف على الإطالة وشكرًا

شكراً على ذكر تجربتك

في الرحلات الطويلة لا تدور غير الخطوط السعودية
حتى لو دفعت شوي زيادة
لأنهم يهتمون براحتك أكثر من اهتمامهم بالتوفير الاقتصادي
المقعد المريح خلال الرحلة الطويلة مهم جداً
وهذا ما لا تقدمه خطوط كثيرة رغبةً في تخفيض السعر المدفوع

الرحلات القصيرة ممكن تركب أي خطوط

امريكان إيرلاينز بالشراكة مع طيران الخليج عاديه ، مسافر ساعه او 14 ساعه نفس الخدمه ويمكن تكون معدومه

حبيت اصحح ان طيران الخليج بالتعاون مع امريكان ايرلاينز تكون الرحلة البحرين لندن امريكا

انا رحت امريكا ثلاث مرات مرتيين برتش ايرويز و مرة طيران الخليج بالتعاون مع يونايتد ايرلاينز الشراء من موقعهم


عموما رحلتك من البحرين الي لندن بتكون علي 787 الدريم لاينر الجديدة و هذي مافي اريح منها و خصوصية عالية في البزنس


دامك في الدمام خذها من البحرين ولك الخيار

طيران الخليج بالتعاون مع الاتحاد
طيران الخليج بالتعاون مع يونايتد من موقعهم و تنزل لندن
طيران الخليج بالتعاون مع امريكان ايرلاينز منوموقع طيران الخليج و تنزل لندن
برتش ايرويز

دائما لما تختار شيك علي انواع الطيارات و اسطول الشركة وشوف فيديوات و صور البلوغرز

الخطوط السعوديه ممتازة كخدمة في الطائرة ولكن اطلع من الدمام الي الرياض او جدة اولا انتظار في المطار مده طويله ثانيا لازم ادخل العفش واخذ البوردنق منهم ليش مثلا مهب مثل الخطوط الثانيه اعطيهم العفش واخذه في نقطة الوصول مع العلم كما قلت التذكرة تعتبر رحلة دولية من الدمام الي امريكا .
نعم امريكان ايرلاينز توقف في لندن انتظار طويل ورحلة ترانزيت بعد رحلة اكثر من 7 ساعات جدا متعبه
انتم في نعيم يا اهل الرياض وجدة تطلعون مباشر ام اهل الدمام الله يعينا على التنقلات بين المطارات

الخطوط الدولية اللي تطلع مباشرة من الدمام
KLM ترانزيت امستردام
مصر للطيران ترانزيت القاهرة
الاردنية ترانزيت عمان
التركية و اشوفها ممتازة لو طلعوك من اسطنبول على 350

اذا ماتبي البرتش و طيران الخليج انطلاقا من البحرين خلك على التركية و اختار الرحلة اللي على 350

هلا والله با اخوي بن قوت ، فعلا والله تعبنا من الترانزيت بس الله يعين ، نعم عندي ولد مريض ومن ذوي الاحتياجات الخاصة ، بالنسبة لطلب حجز العفش ياريت يوافقون بس مهب على كيف الواحد يقولك نظام ام الخطوط الثانيه عطهم العفش من الدمام وأنسى امره الي نقطة الوصول … معانات بس الله يعين

عزيزي ANSD33

‏أنت الآن تمر في نفس المعاناة اللي أنا امر فيها بس الله يسهل امرك
من خلال بحثي الفترة الماضية قرابته الشهر مطار الدمام ارخص شي في الخليج كله حالياً بعده الكويت
‏أنا سفرتي إن شاء الله تاريخ 11 أبريل إلى 30 أبريل الى JFK
الخطوط الهولندية من الدمام 3600
مع العلم قبل سبع ايام كانت على الخطوط التركية 2900 ريال فقط
ومن الكويت 3900 ريال الخطوط الكويتية طيران مباشر
‏ملاحظة: الخطوط الالمانية لوفتهانزا تطلع من الدمام بس توقف في الكويت ساعة
‏الخطوط الهولندية KLM في العودة توقف في الرياض ساعة
‏آسف على الاطالة

مرحبا اخوي سلطان اولا تروح وترجع بالسلامة ، والله ياخوك احيانا مايهم السعر في سبيل راحتك وراحة اللي معاك خصوصًا اذا معك عائلة وايضا معك مريض ، من خلاصة رحلاتي الي المتعددة الي امريكا وبالنسبة لنا يا أهل الشرقية أفضل خطوط خط سير وراحة هي الامارتية ومن ثم القطرية والسعوديه ، ولو انا من اهل الرياض او جدة اقول السعودية ومن ثم الامارتية والقطريه ،
هذا من وجهة نظري وشكرًا