السلام عليكم ورحمة الله وبركاته

كيف حالكم ان شاء الله طيبين
مسافر تركيا انا والمدام 11 ابريل لمدة 15 يوم
وكيف الاجواء بتكون في 11 ابريل عشان احسب حسابي برد شديد امطار غيوم ثلج
الذهاب مطار صبيحة والعودة من صبيحة

11 ابريل اسطنبول الين 13 ابريل
بعدين طيران داخلي على طرابزون وأفكر استاجر سيارة وامشي على أوزنجول من 13 ابريل الين 16

تنصحوني استاجر سيارة الطريق ممتع وممتاز ولا كيف
ومن وين استاجر هل عن طريق موقع او من المطار
بعدين من 16 ابريل الى 20 ابريل في طرابزون
أفكر اروح ايدر من الصباح البن العصر وارجع طرابزون

بعدين من 20 ارجع طيران داخلي اسطنبول الين 25

وابي جدول منكم وترتيبات ونصائح
وهل يحتاج فيزا لسعودي
وهل الادوية ممنوعة

وشرائح الانترنت هل فيه برنامج اقدر اطلعها منه

وش تنصحون اصرف دولارات بعدين اصرف من تركيا ليره على حسب احتياجي

وش البطاقة اللي تنصحوني احد فيها فلوس فيزا مسبقة الدفع


وهل تقسيم في فترة الصباح الين قبل المغرب الوضع فيه امان لو بتمشى فيه

اتمنى الرد اللي عنده خلفيه بالموضوع

اهلا بك

بحاول افيدك على النقاط
وبإذن الله البقية يفيدونك أكثر

الجو في اسطنبول بيكون رائع
وتحتاج جاكيت ربيعي وخصوصاً بالليل

الجو في الشمال التركي بيكون بارد
ما أقول برد قارص ولكن خلك مستعد

إذا تحب القيادة فالاستئجار جميل
الطرق جميلة ومخدومة وميسرة
طبعاً اقصد تستأجر في الشمال التركي
أما في اسطنبول زحمة لا تستأجر سيارة

تقدر تستأجر سيارة من المطار
ولكن إذا بتحسم امورك من بلدك أفضل

هذه شركات مجربة وجيدة
سيزجي خيار أول ثم جارينتا

تقدر تروح من طرابزون لايدر وترجع
والأفضل تجلس ليلة هناك طالما ايامك تسمح
لا يضيع يومك بالطرق ( ساعتين رايح ومثلها راجع )

الجدول والأماكن موجودة بالتقارير
وغالباً أماكن الشمال التركي معروفة
يعني معظم التقارير تكرار لنفس الأماكن

وهذا تقرير فيه أماكن مغمورة ولكن جميلة

https://www.arabtrvl.com/vb/t52904.html

السعودي ما عاد يحتاج فيزا
وكل الأدوية مسموحه بلا تحديد
جورجيا هي اللي تمنع أدوية معينة

استخدمت عدة مرات تطبيق airalo
تغطيته ممتازة وجربته بمعظم المناطق
له شروحات كثير باليوتيوب وفكرته سهلة

البطاقة ركز على سفر بلس الراجحي
وكذلك بطاقة المسافر من بنك الاستثمار
ولابد معك كاش خفيف للصرفيات النثرية
ما يحتاج دولار .. خذ ريال وإذا احتجت تحول لليرة

شارع الاستقلال بكل الأوقات عادي
محد بيتعرض لك طالما ماشي في حالك
ولكن ابتعد عن الدهاليز والأزقة في آخر الليل
ولا تلتفت لأي عروض .. خلك على المحلات بالشارع

بالتوفيق