السلام عليكم ورحمة الله وبركاته

أولاُ أحب أشكر جميع القائمين على هذا الصرح والمشاركين فيه من الأعضاء صراحة أستفدت منه الكثير ولله الحمد.

انا بالبداية الملكة والزواج بيكونون في نفس اليوم ولازم السفره تكون قريبة، وفي هذا التاريخ كنت افضل اني اروح لأوربا خصوصاً محد فينا راح لها أو طلع الشنغن قبل.

بداية حجزت رحلتنا على الخطوط السعودية الدخول إلى فرانكفورت والعودة من باريس طبعاً أخذتها بالاميال وبعدين قعد اهوجس بيني وبين نفسي قلت لو ماطلعت لي الفيزا بينخصم علي مبالغ مالها داعي فأنصحكم يكون حجز الطيران مسترد.

انا رحلتي بتاريخ 27/12/2024 إلى فرانكفورت والعودة بتاريخ 8/1/2025 من باريس بإذن الله.
أول شيء سويته دخلت بوكينق وحجزت 5 ليالي في فرانكفورت (حجوزات مؤكدة والدفع عند الوصول) وكذلك 4 ليالي امستردام و3 ليالي باريس وحطيت اسمي بالحجز ولعدد شخصين.

بعدها حجزت سيارة استلامها في فرانكفورت وتسليمها في امستردام من شركة sixt (حجز مؤكد والدفع عند الوصول).
وكذلك حجزت قطار من امستردام إلى باريس من برنامج eurostar (حجز مؤكد ومدفوع).

بعدها ياطويلين الأعمار عبيت الفورم حق الشنغن وبسيط وماياخذ 5 دقايق ومشروح في كل مكان، وطلعت تأمين طبي من تكافل الراجحي (ومكتوب أنه يشمل منطقة شنغن).

بعدها جبت تعريف موظف وتعريف راتب وكذلك كشفين للحساب (واحد للي ينزل فيه الراتب والثاني اللي فيه الفلوس)

بالنسبة للمدام كتبت خطاب اني انا بتكفل بكامل المصاريف لخطيبتي وحطيت تاريخ الرحله ورقم الجواز واسمها وارفقت معها تعريف راتبي وكشف بحسابي وكذلك تعريف لراتبها (بدون كشف لحسابها).


اخذت موعد في تاريخ 10/10/2024 يوافق كان يوم خميس وبعد الظهر ولله الحمد كان شبه فاضي المكتب مع هذا اخذت البريموم لاني مستعجل كنت (ماكان فيه أحد)

دخلت الساعه 1:15 طلعت الساعه 2:00 والحساب كان 750 للجواز الواحد.

بالنسبة للأوراق أهم شيء تجيب معك:
1- نموذج التأشيرة
2- حجوزات الفنادق والطيران والتنقلات
3- تعريف راتب وتعريف موظف
4- كشف لحسابك البنكي (انا كان اسمي بأحد الكشوفات بالعربي وعادي مشوه)
5- خطاب الضامن (بحطه تحت)
6- صورتين شخصية
7- صورة من الهوية الوطنية
8- ترجمة الهوية الوطنية وبطاقة العائلة أن وجدت
9- صورة من الجواز بعد التوقيع.
10- التأمين الطبي (اخذته من تكافل الراجحي ب100 ريال)


طبعاً كان عندي تخوف بسبب الأسم بكشف الحساب اللي فيه الفلوس وكذلك خطاب الضامن كانوا يقولون لازم بطاقة عائلة وكذلك لازم قريب من الدرجة الأولى لكن الحمدلله تيسرت الأمور واستلمت الفيزا اليوم بتاريخ 17/10/2024 (أخذت 5 أيام عمل) ومدتها 5 سنوات، وبالنسبة للمدام جوازها بينتهي بعد 4 سنوات تقريباً فخلوا لها الفيزا تنتهي قبل نهاية الجواز بثلاثة أشهر.


الحين بعد ماطلعت الفيزا بحط الجدول اللي ابيه لكن ماننسى ناخذ معنا مايثبت اننا بنقعد أكثر شيء في المانيا عشان إجراءات المطار وبعد ذلك أكنسلها عادي.

هذا والله الموفق، والسلام عليكم.